داليا البحيري: طردت ابويا واخواتي من البيت خوفا عليهم
كشفت الفنانة داليا البحيرى، نتيجة مسحة كورونا الخاصة بها وبأولادها وبالعاملين داخل منزلها، مؤكدة أن كل العينات ظهرت سلبية وغير حاملة للفيروس، رغم تأكيد إصابة زوجها بالفيروس وظهور مسحته الخاصة به والتي كانت إيجابية، وأكدت إنها فرضت عزل كامل في المنزل ورفضت استقبال والدها وأشقائها الذين حضروا للاطمئنان عليها، خوفا عليهم من العدوى
البحيرى كشفت نتيجة الفحص عبر منشور طويل بحسابها على مكوقع الفيس بوك قالت فيه: أحب أطمنكوا جميعا نتيجة المسحات طلعت والف حمد وشكر ليك يا رب كلها طلعت سلبية ليا وللولاد كلهم والمساعدين في البيت شكرا يارب علي كرمك ...احب اطمنكوا كمان ان حسن الحمد لله كويس وبيشكركم كلكم على الرسايل والتليفونات بجد حبكم لينا ومساندتكم لينا عندنا بالدنيا وأحلى نعمة من ربنا.
وأضافت: آسفة اني ساعات مش بلحق ارد علي كل مكالماتكم او بضطر اقفل في نص المكالمة عشان دكتور بيتصل علي الناحية التانية او معمل او صيدلية...بجد بشكركم علي جمال قلبكم واهتمامكم ودعواتكم لأبو علي حبيب الكل ربنا يقومه بالسلامة وبشكر كل اللي بعت رسالة عشان مقدر لبختنا...انتم جميعا فوق الراس وجوه القلب...ربنا يحفظكم جميعا من كل شر ويحفظ عائلتكم وحبايبكم.
وأضافت داليا البحيرى، خلال اتصال هاتفى ببرنامج "التاسعة"، الذى يقدمه الإعلامى وائل الإبراشى، عبر القناة الأولى المصرية، أنها تلتزم بكافة الإجراءات الطبية والاحترازية، وتابعت: إصابة حسن كانت خبطة كبيرة لنا.
وأكدت البحيرى أنها قامت بعزل أسرتها على الفور، فضلاً عن أنها رفضت استقبال أى من أشقائها من الذين قدموا للاطمئنان عليها، وتابعت: طردت أبويا وإخواتى من البيت إمبارح خوفا عليهم.
ووجهت رسالة إلى المصريين، ناشدتهم خلالها باتباع التعليمات الطبية والوقائية، فى التعامل مع جائحة فيروس كورونا، وتابعت: "وبعد كده الفيروس مش عيب ده زيه زى أى فيروس زى البرد واللى يتصاب عليه أن يتبع الإجراءات الطبية ولا يخفى أمره.
وكانت داليا البحيرى أعلنت عن إصابة زوجها عبر "فيس بوك" وكتبت: "أنا حبدأ بألف حمد وشكر ليك يارب، لأن أنا عارفة ومتأكدة إن احنا عملنا اللي علينا وزيادة، حافظنا وقعدنا في البيت، وعقمنا وطهرنا، وانتقدنا اللي نزل انطلق واتفسَّح، وأنا والحمد لله راضية جدا بقضاء ربنا سبحانه وتعالى، حسن جوزي وحبيبي طلع إيجابي كورونا فيروس، ربنا يشفيه ويعافيه يارب".
وتابعت داليا البحيري قائلة: إحنا كلنا عملنا مسحات تحليل كورونا، أنا والأولاد، واللي بيساعدونا في البيت، عشان نطمن، لأننا كنا مخالطين لحسن، وبإذن الله نعرف النتيجة بكرة بليل، وربنا يجيب العواقب سليمة يارب".
وأضافت البحيري: أنا بقول الكلام ده عشان أي حد لازم يعمل كده، لازم يقول، وبكل وضوح عشان الناس اللي كانت مخالطة ليهم يعرفوا، ويطمنوا على نفسهم، لأن دي أمانة، والمرض مش حاجة الواحد يخجل منها.
حسن سامي كتب بيانا مختصرا مطالبا كل من يعرفه بعدم الاتصال به وقال: الحمد لله علي كل شئ، حالتي كويسة جداً، دعواتكم مكونش نقلت العدوة لمراتي والولاد اهم حاجة، اسألكم الدعاء.
أضاف: ارجوكم بلاش اتصال، انا كتبت البوست علشان اي حد تعامل معايا او حد من القريبين مني يعرف مش اكتر.
